Կորպորատիվ Կառավարման Կենտրոնը ս.թ. ապրիլի 30-ին կազմակերպել էր հանդիպում Տնտեսական լրագրողների ակումբում:
Հանդիպման ընթացքում Կորպորատիվ Կառավարման Կենտրոնի տնօրեն Նարինե Մելիքյանը ներկայացրեց Բիզնեսի բարեվարքության ակումբի առաքելությունը և դրա սպասվելիք ազդեցությունը Հայաստանի գործարար միջավայրի վրա:
Իր խոսքում Նարինե Մելիքյանը կարևորեց տնտեսական լրագրողների դերը ընկերությունների կորպորատիվ կառավարման համակարգի արդյունավետության բարձրացման, հատկապես` ընկերությունների կառավարման «կարմիր դրոշակները» կամ վտանգի ազդակները բացահայտելու և կորպորատիվ կառավարման պատշաճ համակարգի արդյունքները ներկայացնելու հարցերում: Այս նկատառումով նա խորհուրդ տվեց ուսումնասիրել Կորպորատիվ Կառավարման Համաշխարհային Համաժողովի և IFC-ի կողմից հատուկ լրագրողների համար մշակված «Ով է կառավարում ընկերությունը» ուղեցույցը և ընդհանուր գծերով ներկայացրեց դրա բովանդակությունը:
Հանդիպմանը մասնակցում էր Միջազգային մասնավոր ձեռնարկատիրության կենտրոնի (CIPE, www.cipe.org) ծրագրերի պատասխանատու Լուիզա Այվազյանը, ով ներկայացրեց Հայաստանում CIPE-ի աջակցությամբ իրականացվող ծրագրերը:
