Կորպորատիվ Կառավարման Կենտրոնը հունիսի 13-ին կազմակերպել էր «Կորպորատիվ քարտուղարի դերը ՀՀ կորպորատիվ կառավարման կանոնագրքի ներդրման հարցում» սեմինարը` հաշվի առնելով կորպորատիվ քարտուղարների զգալի դերակատարումն ընկերությունների կորպորատիվ կառավարման պրակտիկան բարելավելու հարցում:
Սեմինարի ընթացքում ներկայացվել և քննարկվել են՝
🔹Կորպորատիվ քարտուղարի դերի զարգացման ժամանակակից միտումները,
🔹ՀՀ կորպորատիվ կառավարման նոր կանոնագիրքը և դրանում ամրագրված մոտեցումներն ու սկզբունքները,
🔹ՀՀ կորպորատիվ կառավարման կանոնագրքի փուլային ներդրման հնարավորությունները,
🔹Կորպորատիվ կառավարման առաջընթացի մատրիցայի էությունը,
🔹ՀՀ կորպորատիվ կառավարման կանոնագրքի շրջանակներում բացահայտումներն ու հաշվետվողականությունը և այլ հարցեր։
Սեմինարին մասնակցել է շուրջ 50 անձ: Չնայած սեմինարը հասցեագրվել էր ընկերությունների կորպորատիվ կառավարման քարտուղարներին (խորհրդի քարտուղարներին), դրան մասնակցել են նաև ընկերությունների խորհրդի և գործադիր մարմնի անդամներ, ներքին աուդիտորներ և կորպորատիվ կառավարման այլ պատասխանատուներ:
Մասնակիցները բարձր են գնահատել սեմինարի բովանդակությունը և ընդգծել նման միջոցառումները հաճախակի կազմակերպելու նպատակահարմարությունն ու ընկերություններին Կորպորատիվ կառավարման կանոնագրքի ներդրման, տարեկան հաշվետվությունների մշակման հարցում խորհրդատվական աջակցություն տրամադրելու անհրաժեշտությունը:
ՀՀ կորպորատիվ կառավարման կանոնագիրքը հաստատվել է ՀՀ էկոնոմիկայի նախարարի 2024թ․-ի հուլիսի 30-ի թիվ 1955-Ն հրամանով և ուժի մեջ մտել 2024թ․-ի օգոստոսի 30-ին:
Կանոնագիրքն իրավական ակտ է, որը բովանդակում է տնտեսական ընկերության կառավարման արդյունավետության բարձրացմանը, մասնակիցների իրավունքների պաշտպանությանը, գործունեության թափանցիկությանը և հաշվետվողականության բարձրացմանն ուղղված սկզբունքներ և ուղենիշներ:
