Խորհրդի նիստը խորհրդի անդամների պաշտոնական հավաքն է, որի հիմնական նպատակը խորհրդի անդամներին խորհրդի իրավասության ներքո գտնվող հարցերի վերաբերյալ որոշումներ կայացնելու և կազմակերպության գործունեության մեջ ռազմավարական միջամտություններ կատարելու հնարավորության ընձեռումն է:
Խորհրդի նիստի կազմակերպվածությունը, այդ թվում` տրամաբանված օրակարգը, քննարկվող հարցերի առարկայական լինելը, դրանց ողջամիտ ցանկը, գործառնական և ռազմավարական հարցերի հավասարակշռվածությունը, հստակ սահմանված առաջնահերթությունները, խորհրդի անդամի համար կարող է լրացուցիչ խթան հանդիսանալ նիստերում իր տեղեկացված և հետաքրքրված մասնակցությունն ապահովելու համար:
Առաջնորդվելով նշվածով` Կորպորատիվ Կառավարման Կենտրոնը մշակել և ս.թ. նոյեմբերի 28-ին կայացած սեմինար-քննարկմանը շահակից հանրության ուշադրությանը ներկայացրել է «Ինչպե՞ս կազմակերպել խորհրդի նիստերը» ուղեցույցը:
Կորպորատիվ Կառավարման Կենտրոնի տնօրեն Նարինե Մելիքյանն իր խոսքում անդրադարձ կատարեց Ուղեցույցում բովանդակվող 19 հարցուպատասխանին, որոնք ոչ միայն բացահայտում են խորհրդի նիստերի կազմակերպման և անցկացման գրեթե բոլոր էական կողմերը, այլև առաջարկում լուծումներ:
Սեմինար-քննարկմանը մասնակցել են հայաստանյան ընկերությունների խորհրդի անդամներ, գործադիր մարմնի ղեկավարներ, կորպորատիվ քարտուղարներ, խորհրդատուներ և կորպորատիվ կառավարման այլ պատասխանատուներ: Նրանք հնարավորություն ունեցան ոչ միայն ստանալ իրենց հուզող հարցերի պատասխանը, այլև կիսվել սեփական փորձով և գործելաոճով:
Ուղեցույցը մշակվել և սեմինար—քննարկումն անցկացվել է Կորպորատիվ Կառավարման Կենտրոնի կողմից Միջազգային մասնավոր ձեռնարկատիրության կենտրոնի աջակցությամբ Միացյալ Թագավորության միջազգային զարգացման շրջանակում՝ ՄԹ կառավարության կողմից ֆինանսավորվող «Արձագանքելով Հայաստանում քայքայիչ կապիտալի սպառնալիքներին․ Փուլ III» ծրագրով:
