Պետական մասնակցությամբ ընկերությունների (ՊՄԸ-ներ) կողմից կորպորատիվ կառավարման բարձր չափանիշներին հետևելը նպաստում է տնտեսական անվտանգությանն ու դիմակայունությանը`
- բարձրացնելով հանրային սեփականության արժեքը,
- խթանելով տնտեսության համար ռազմավարական նշանակություն ունեցող ՊՄԸ-ների կենսունակությունը,
- նվազեցնելով կոռուպցիոն ռիսկերի ծագման հավանականությունը,
- ամրապնդելով հանրության շահերը հաշվի առնող կառավարման գործելաոճը:
Հաշվի առնելով նշվածը, ինչպես նաև այնպիսի զարգացումներ, ինչպիսիք են ՀՀ կառավարության 2025թ.-ի նոյեմբերի 14-ի թիվ 1617-Ն որոշմամբ հաստատված ՀՀ պետական մասնակցությամբ ընկերությունների և մինորիտար մասնակցությամբ ընկերությունների սեփականության քաղաքականությունը և ՀՀ կորպորատիվ կառավարման կանոնագրքի (Կանոնագիրք) հնարավոր կիրառումը ՊՄԸ-ների նկատմամբ, Կորպորատիվ Կառավարման Կենտրոնը, Կոռուպցիայի կանխարգելման հանձնաժողովը և Պետական գույքի կառավարման կոմիտեն համատեղ կազմակերպել էին «ՀՀ կորպորատիվ կառավարման կանոնագրքի ներդրումը ՊՄԸ-ներում» վերապատրաստումը:
Վերապատրաստումը նպատակ էր հետապնդում բարձրացնել ՊՄԸ-ների իրազեկվածության մակարդակը`
- Կանոնագրքի ներդրման շարժառիթների և առավելությունների,
- Կանոնագրքի հիմքում ընկած մոտեցումների,
- Կանոնագրքի հիմնարար սկզբունքների,
- Կանոնագրքով նախատեսվող բացահայտումների վերաբերյալ:
Վերապատրաստման հասցեատերերն էին ՊՄԸ-ների խորհրդի, գործադիր մարմնի անդամները, կորպորատիվ քարտուղարները և կորպորատիվ կառավարման այլ պատասխանատուներ:
Վերապատրաստումն իրականացվել է Միջազգային մասնավոր ձեռնարկատիրության կենտրոնի աջակցությամբ Միացյալ Թագավորության (ՄԹ) միջազգային զարգացման շրջանակում՝ ՄԹ կառավարության կողմից ֆինանսավորվող «Արձագանքելով Հայաստանում քայքայիչ կապիտալի սպառնալիքներին․ Փուլ III» ծրագրով:
