Կորպորատիվ Կառավարման Կենտրոնը 2022թ.-ի հուլիսի 29-ին Բիզնեսի բարեվարքության ակումբի շրջանակներում կազմակերպել էր «Տնօրենների խորհրդի դերը հարկային համապատասխանության հարցում» վարպետության դասը, որը վարեց «Բի-Դի-Օ Արմենիա» ընկերության գործընկեր, հարկային և իրավաբանական ծառայությունների ղեկավար Ահարոն Չիլինգարյանը:
Վարպետության դասի թեմայի էությունը պարզաբանելու նպատակով բանախոսն իր խոսքի սկզբում մանրամասնեց հարկերի, ընկերությունների հիմնական գործառույթները և պետական կառույցների հարկային նորազդեցությունները կորպորատիվ աշխարհի վրա:
Հարկային համապատասխանության խնդիրները բանախոսի կողմից դիտարկվեցին աշխարհի գլոբալացման և դրա արդյունք հանդիսացող միջազգային մի շարք սկզբունքների և թիրախների (UN Principles for Responsible Investment, UN Sustainable Development Goals և այլն) լույսի ներքո:
Անդրադառնալով ընկերությունների կողմից հարկային ռազմավարության ընդունման ջատագովներին, բանախոսն առանձնացրեց կորպորատիվ խորհուրդների դերակատարումը` որպես հարկային համապատասխանության վարքի ձևավորող ընկերություններում:
Իր խոսքի վերջում բանախոսը մասնակիցներին ներկայացրեց Հարկային քաղաքականության բովանդակության տիպային օրինակը` մանրամասնելով դրա յուրաքանչյուր բաղադրիչի էությունը:
Միջոցառման ավարտին Կորպորատիվ Կառավարման Կենտրոնի 20-ամյակի կապակցությամբ Ահարոն Չիլինգարյանին շնորհվեց շնորհակալագիր` Կենտրոնի գործունեությանը աջակցության, ինչպես նաև Հայաստանի կորպորատիվ կառավարման միջավայրի զարգացման հարցում ունեցած ներդրման համար:
Միջոցառման մասնակիցներն արտահայտեցին իրենց բարձր գոհունակությունը, և, ինչպես բացման իր խոսքում նշել էր Կորպորատիվ Կառավարման Կենտրոնի հոգաբարձուների խորհրդի նախագահ Տիգրան Կարապետյանը՝ իրապես ստացվեց վարպետաց դաս վարպետից:
Վարպետության դասը կազմակերպել է Կորպորատիվ Կառավարման Կենտրոնը Միջազգային Մասնավոր Ձեռնարկատիրության Կենտրոնի աջակցությամբ իրականացվող «ԵՎՐԱՍԻԱ. ՁԵՎԱՎՈՐԵԼ ԲԱՐԵՆՊԱՍՏ ՊԱՅՄԱՆՆԵՐ ԿԱՌՈՒՑՈՂԱԿԱՆ ԿԱՊԻՏԱԼԻ ՀԱՄԱՐ, 2-ՐԴ ՓՈՒԼ» ծրագրի շրջանակներում:
