Հայ կանայք տնօրենների խորհրդում ցանց
Դեկտեմբերի 9-ին Հայ կանայք տնօրենների խորհրդում ցանցի ձևավորման նախաձեռնող խումբը հաստատեց Ցանցի գործունեության կանոնները:
Կանոնները մշակվել են` հիմնվելով փորձագիտական հարցման արդյունքների, միջազգային փորձի ուսումնասիրության, ինչպես նաև Ցանցի շահակիցների դիտարկումների և առաջարկությունների հիման վրա:
Ցանցի առաքելությունն է խթանել լավ կառավարումը Հայաստանում` կազմակերպությունների կառավարման համակարգում բազմազանության և ներառականության մշակույթի տարածման միջոցով:
Ցանցի հիմնական նպատակներն են`
- շարունակական հիմունքներով զարգացնել հայ կանանց` խորհուրդներում և գործադիր ղեկավար թիմերում գործելու կարողությունները,
- օժանդակել կազմակերպությունների խորհրդում և/կամ գործադիր ղեկավար թիմում գործող կամ համապատասխան ներուժ ունեցող կանանց տեսանելիությանը և գործարար միջավայրում ճանաչմանը,
- ստեղծել տաղանդավոր հայ կանանց համայնք, ովքեր հետաքրքրված են, պատրաստ են և ունակ են ստանձնել պատասխանատվություն՝ գործելու որպես կազմակերպությունների խորհրդի և/կամ գործադիր թիմի անդամ,
- խթանել Ցանցի մասնակիցների միջև փորձի փոխանակման և գործարար կապեր հաստատելու հնարավորությունները,
- նպաստել հայաստանյան և արտասահմանյան կազմակերպությունների միջև կապերի հաստատմանը:
Ցանցին կարող է մասնակցել ցանկացած չափահաս ֆիզիկական անձ, այդ թվում` Հայաստանի Հանրապետության, ինչպես նաև օտարերկրյա ցանկացած քաղաքացի, ով ցանկանում է ակտիվորեն մասնակցել Ցանցի գործունեությանը և ընդունում է դրա Կանոնները:
Ցանցին մասնակցության տարեկան վճարը կազմում է 20000 ՀՀ դրամ:
Ցանցին մասնակցության հայտերն ընդունվում են նաև էլեկտրոնային` Կորպորատիվ Կառավարման Կենտրոնի կայքէջի միջոցով:
Նախաձեռնող խմբի մասնակիցները հայտնեցին իրենց պատրաստակամությունը աջակցելու Ցանցի կայացմանը և առաքելության իրագործմանը:
