Բիզնեսի բարեվարքության ակումբ
Ակումբի մասնակիցների շրջանում անցկացված հարցման արդյունքներով` Ակումբի 2022թ.-ի գործունեությունն արդարացրել է նրանց սպասումները: Այդ մասին նշել է հարցվածների 88%-ը:
2023թ.-ին Կենտրոնը` որպես Ակումբի քարտուղարություն, շարունակելու է աշխատանքները Ակումբի ընդլայնման և նոր մասնակիցների հավաքագրման ուղղությամբ` կենտրոնանալով.
- բարեվարքության և հակակոռուպցիոն համապատասխանության առաջադեմ փորձ ունեցող խոշոր ընկերությունների,
- Ակումբի մասնակիցների մատակարարման շղթայում գործող բիզնես գործընկերների և այլ երրորդ անձերի,
- պետական ձեռնարկությունների վրա:
2023թ.-ին Ակումբի քարտուղարությունը նախատեսում է էթիկայի և հակակոռուպցիոն համապատասխանության ծրագրի առանձին հենասյուների վերաբերյալ Ակումբի մասնակիցների համար անցկացնել խորացված թեմատիկ դասընթացներ (կոռուպցիոն ռիսկերի գնահատումը բիզնեսում, բարեվարքության մշակույթը խթանելու համար աշխատակիցների և գործընկերների նկատմամբ խրախուսման ու կարգապահական միջոցների կիրառումը): Հատուկ միջոցառումներ կնվիրվեն խորհրդի գործունեության և դրա գնահատման, ինչպես նաև կորպորատիվ հաշվետվողականության և ոչ ֆինանսական հաշվետվությունների էության լուսաբանմանը:
Հաջորդ տարի շարունակվելու են Ակումբի մասնակիցների հակակոռուպցիոն համապատասխանության վերլուծությունները, իսկ 2023թ․-ի հունվարի 1-ց մեկնարկելու է նրանց հաշվետվողականության ժամանակահատվածը։
Ակումբի գործունեության ռազմավարական նշանակության հարցերի վերաբերյալ կոլեգիալ որոշումների պրակտիկան զարգացնելու և դրանց օպերատիվությունը բարձրացնելու նպատակով 2023թ.-ին Ակումբում կձևավորվի խորհրդատվական խորհուրդ:
