Դեկտեմբերի 15-ին տեղի ունեցավ «Հայաստան. բարեվարքությունը մասնավոր հատվածում» աշխատաժողովը, որը Կորպորատիվ Կառավարման Կենտրոնը կազմակերպել էր ՀՀ արդարադատության նախարարության հետ համագործակցությամբ:
Աշխատաժողովը նպատակ էր հետապնդում բարձրացնել Հայաստանի գործարար համայնքի ներկայացուցիչների իրազեկվածությունը բարեվարքության մշակույթի, հակակոռուպցիոն համապատասխանության շարժառիթների և այս ուղղությամբ վարվող պետական քաղաքականության, ինչպես նաև իրականացվող նախաձեռնությունների մասին:
Աշխատաժողովի ընթացքում գործարար համայնքի ներկայացուցիչները վերապատրաստվեցին կոռուպցիայի դեմ պայքարին և դրանում գործարար համայնքի դերակատարմանն առնչվող հարցերի վերաբերյալ:
ՀՀ արդարադատության նախարարության Հակակոռուպցիոն մոնիթորինգի բաժնի պետ, ՏՀԶԿ Հակակոռուպցիոն ցանցում և Բիզնես բարեվարքության խմբում ՀՀ ազգային համակարգող Հասմիկ Տիգրանյանը ներկայացրեց հակակոռուպցիոն հիմնական բարեփոխումները Հայաստանում` ընդգծելով կոռուպցիայի դեմ պայքարի արդյունքում գրանցված ձեռքբերումները, զարգացման ապագա ուղղությունները և գործարար ոլորտի դերակատարումը կոռուպցիայի դեմ պայքարում:
Կորպորատիվ Կառավարման Կենտրոնի տնօրեն Նարինե Մելիքյանը ներկայացրեց բիզնեսի հակակոռուպցիոն անհատական և հավաքական գործողությունների դերակատարումը կոռուպցիայի կանխարգելման հարցերում:
Նա մանրամասնեց Բիզնեսի բարեվարքության ակումբի` որպես Հայաստանի առաջին հակակոռուպցիոն հավաքական նախաձեռնության գործունեության հիմնական ուղղությունները և զարգացման հեռանկարները:
