«Կորպորատիվ կառավարման տարեկան համաժողով Հայաստանում – 2023»-ի պաշտոնական մեկնարկը Կորպորատիվ Կառավարման Կենտրոնի կողմից տրվեց հունիսի 29-ին «Նեթվորքինգի օր» միջոցառմամբ:
Նեթվորքինգի միջոցառման շարժառիթը Համաժողովի միջտարածաշրջանային բնույթն էր` տարբեր երկրներից ինչպես մասնակիցների, այնպես էլ բանախոսների հյուրընկալումը:
Միջոցառումը նպատակ էր հետապնդում`
- Համաժողովի բանախոսներին և մասնակիցներին հաղորդակից դարձնել Հայաստանի հետ,
- նպաստել Համաժողովի տեղական և արտասահմանյան մասնակիցների ոչ պաշտոնական շփումներին ու համագործակցության հնարավոր եզրեր գտնելուն:
Նեթվորքինգի միջոցառմանը մասնակցել են Բիզնեսի բարեվարքության ակումբի, «Հայ կանայք տնօրենների խորհրդում» ցանցի մասնակիցները, CIPE-ի, CLDP-ի ներկայացուցիչները, գործընկերներ Վրաստանից, Ղազախստանից, Ղրղըզստանից և Կենտրոնի այլ շահակիցներ:
Միջոցառմանը բացման խոսքով հանդես են եկել Նարինե Մելիքյանը, Լուիզա Այվազյանը, Մայքլ Քոֆիլդը:
Միջոցառման մասնակիցները հնարավորություն ունեցան ՀՀ նախկին փոխվարչապետ, Ամերիկյան համալսարանի տնտեսագիտության և բիզնեսի քոլեջի դեկան Վաչե Գաբրիելյանի և Կենտրոնի հոգաբարձուների խորհրդի նախագահ Տիգրան Կարապետյանի երկխոսության միջոցով բացահայտել Հայաստանի տնտեսության փուլային կայացման առանձնահատկությունները և դրանց ընթացքում կորպորատիվ կառավարման ինստիտուտի կրած վերափոխումները:
Միջոցառման կազմակերպման շարժառիթներից էր «Կանայք տնօրենների խորհրդում – 2023»-ի շրջանավարտներին հավաստագրերի շնորհումը: 35 շրջանավարտի տրվեց հաջողությամբ ավարտածի հավաստագիր, իսկ երեքին` վերապատրաստմանը մասնակցածի: Վերապատրաստման մեկնարկից մինչ օրս Կենտրոնը վերապատրաստել է շուրջ 100 կնոջ, որոնցից 84-ին շնորհվել է Հաջողությամբ ավարտածի հավաստագիր:
Հավաստագրերի շնորհման արարողության վերջում հայաստանյան ընկերությունների տնօրենների խորհրդում կանանց ներառականությունն ապահովելու հիմնահարցերում Կենտրոնի, «Հայ կանայք տնօրենների խորհրդում» ցանցի առաքելությանն աջակցող խոսքով հանդես եկան Eric Salmon & Partners միջազգային խորհրդատվական ընկերության տնօրենների խորհրդի գլոբալ պրակտիկայի ղեկավար Հագեն Շվայնիցը (Գերմանիա) և Բիզնեսի բարեվարքության ակումբի մասնակից «Բի-Դի-Օ Արմենիա» ընկերության գործընկեր և խորհրդատվական թիմի ղեկավար Ալեքսանդր Շաղիկյանը: