Մայիսի 21-ին Կորպորատիվ Կառավարման Կենտրոնը ներածական հանդիպմամբ մեկնարկեց «Կանայք տնօրենների խորհրդում» վերապատրաստում – 2024-ը:
Հանդիպման ընթացքում մասնակիցներին ներկայացվեցին վերապատրաստման նպատակը, հիմնական թեմաները և վերապատրաստման դասընթացավարներին, որոնց կազմում են կորպորատիվ կառավարման և հարակից ոլորտների տեղական և միջազգային այնպիսի հայտնի փորձագետներ, ինչպիսիք են` Նարինե Մելիքյանը, Հագեն Շվայնիցը, Արա Չալաբյանը, Ելենա Խաչվանքյանը, Իրինա Չոբանյանը, Լիլիթ Գևորգյանը, Հասմիկ Խաչատրյանը, Սիրարփի Գրիգորյանը։
Կարևորելով հայաստանյան ընկերությունների խորհուրդներում բազմազանության, հավասարության և ներառականության սկզբունքների ամրապնդումը` Կորպորատիվ Կառավարման Կենտրոնի տնօրեն Նարինե Մելիքյանը հատուկ անդրադարձ կատարեց «Հայ կանայք տնօրենների խորհրդում» ցանցի առաքելությանն ու գործունեության հիմնական ուղղություններին:
Հանդիպման ընթացքում վերապատրաստման մասնակիցները հնարավորություն ունեցան ոչ միայն ներկայացնել իրենց փորձը, վերապատրաստմանը մասնակցելու շարժառիթներն և սպասումները, այլև հաղորդակցվել միմյանց և Ցանցի մասնակիցների հետ:
Ընթացիկ տարում վերապատրաստման մասնակիցների կազմը բավականաչափ բազմազան է: Դրանում ապահովված է գործարար, հանրային և քաղհասարակության հատվածների ներկայացվածությունը:
Նախորդ երեք տարիների ընթացքում վերապատրաստումը հաջողությամբ ավարտել Է շուրջ 80 կին, որոնց մի մասը համալրել է հայաստանյան կազմակերպությունների խորհուրդների կազմը:
«Կանայք տնօրենների խորհրդում» վերապատրաստումը կազմակերպում է Կորպորատիվ Կառավարման Կենտրոնը Միջազգային մասնավոր ձեռնարկատիրության կենտրոնի (CIPE) աջակցությամբ:
