Հոկտեմբերի 18-ին Կորպորատիվ Կառավարման Կենտրոնը հրավիրել էր Բիզնեսի բարեվարքության ակումբի բաց հանդիպում` այն նվիրելով Հայաստանում ձեռնարկատիրական գործունեության ոլորտի օրենսդրական առանցքային փոփոխություններին։
Հանդիպումն անցկացրին «ԹԻՔԵՅ ԸՆԴ ՓԱՐԹՆԵՐՍ» իրավաբանական գրասենյակի ավագ գործընկեր Միսակ Բաբաջանյանը և ավագ մասնագետ Սուրեն Բաղդասարյանը:
Հանդիպման ընթացքում բանախոսները ներկայացրին ձեռնարկատիրական գործունեության հետ առնչվող ՀՀ քաղաքացիական օրենսգրքի փոփոխությունները, «Բաժնետիրական ընկերությունների մասին» ՀՀ օրենքի, ՀՀ աշխատանքային օրենսգրքի փոփոխությունները և լրացումները, անդրադարձ կատարեցին նաև նշված նորմատիվ ակտերի իրավակիրարկման պրակտիկային ու հարկային օրենսդրությանը: Բանախոսները թեման զարգացրին` մասնակիցների հարցերին պատասխանելով:
Հանդիպմանը մասնակցել են Բիզնեսի բարեվարքության ակումբի, «Հայ կանայք տնօրենների խորհրդում» ցանցի մասնակիցները և Կենտրոնի այլ շահակիցներ:
Հանդիպումը կազմակերպվել է Միջազգային մասնավոր ձեռնարկատիրության կենտրոնի (CIPE) աջակցությամբ իրականացվող «Եվրոպա և Եվրասիա. կառուցողական կապիտալի համար բարենպաստ միջավայրի ձևավորում — 4-րդ փուլ» ծրագրի շրջանակներում:
